የ46ኛው የኢትዮጵያ አትሌቲክስ ሻምፒዮና

ሕግና ደን

ዓላማ፡ -

  1. በክልሎች፣ በከተማ አስተዳድሮች፣ በክለቦችና በማሠልጠኛ ማዕከላት ለሚገኙ አትሌቶች የውድድር ዕድል ለመፍጠር፤
  2. ተተኪ አትሌቶችን ለማፍራት፤
  3. ለብሔራዊ አትሌቲክስ ስልጠና አትሌቶችን ለመምረጥ፤
  4. ለአህጉራዊና አለም አቀፍ አትሌቲክስ ሻምፒዮናዎች አገራችን ኢትዮጵያን ወክለው የሚወዳደሩ አትሌቶች ለመምረጥ፤

አንቀጽ አንድ

አጠቃላይ የውድድሩ ደንብ

  1. የውድድሩ መጠሪያ፡- ይህ ውድድር 46ኛው የኢትዮጵያ አትሌቲክስ ሻምፒዮና ተብሎ ይጠራል፡፡
    1. ውድድሩ የሚመራው፡- በኢትዮጵያ አትሌቲክስ ፌዴሬሽንና በIAAF ውድድር ህግና ደንብ መሠረት ይመራል፡፡
  2. ውድድሩን በበላይነት የሚመራ አካል፡- የኢትዮጵያ አትሌቲክስ ፌዴሬሽን ነው፡፡

-    የውድድሩ አግባብነት፡- በአንድ የውድድር ተግባር ሁለት ቡድኖች፣ ሦስት እና ከሦስት በላይ አትሌቶች ተመዝግበው ለውድድር ከቀረቡ ውድድሩ ይካሄዳል፡፡ ከዚህ በታች ከሆነ ግን ከቀጣይ ውድድሮች እንደ አስፈላጊነቱ ሊታገድ ይችላል፡፡

-    ውድድሩ በክልል፣ በከተማ አስተዳደርና በክለብ የተከፈለ ሳይሆን በአንድነት ሆኖ ቡድኖች በሚያስመዘግቡት ውጤት መሠረት ለአሸናፊዎች ነጥብና የዋንጫ ሽልማት ይሰጣል፡፡

አንቀጽ ሁለት

የውድድሩ ቀንና ቦታ

46ኛው የኢትዮጵያ አትሌቲክስ ሻምፒዮና ግንቦት 8-13/2009 ዓ.ም. በአዲስ አበባ ስታድየም ይካሄዳል፡፡

አንቀጽ ሦስት

የውድድሩ ዕድሜ

  1. በዚህ ውድደር የሚካፈሉ ታዳጊ አትሌቶች ማለትም ዕድሜያቸው 16 ወይም 17 ዓመት የሆኑ አትሌቶች  /1992-1993 ዓ.ም. / ወይም /እ.ኤ.አ 200-2001/ የተወለዱ ለውርወራ ተግባራት፣ በ10,000 ሜትር፣ በእርምጃ ውድድሮች መሳተፍ አይችሉም፡፡ ነገር ግን በሌሎች የውድድር ተግባራት መሳተፍ ይችላሉ፡፡
  2. ዕድሜያቸው ከ16 ዓመት በታች የሆኑ አትሌቶች /በ1994 ዓ.ም. /እ.ኤ.አ በ2002/ የተወለዱ በዚህ ውድድር መካፈል አይችሉም፡፡

አንቀጽ አራት

በውድድር መሳተፍ

አንድ አትሌት በሦስት የግል እና በአንድ የቡድን (ሪሌ) ብቻ መሳተፍ ይችላል፡፡

 

አንቀጽ አምስት

ምዝገባ

  1. የምዝገባ ጊዜ ከሚያዝያ 24 እስከ ግንቦት 1/2009 ዓ.ም.  ድረስ ይሆናል፡፡ ከላይ በተጠቀሰው የምዝገባ ጊዜ ገደብ ውስጥ ያልተመዘገበ ቡድን ብር 3ዐዐ (ሶስት መቶ ብር) በመክፈል ግንባት 2/2009 ዓ.ም እስከ ቀኑ 6፡30 ብቻ መመዝገብ ይችላል፡፡
  2. ማንኛውም ተሳታፊ ቡድን በየውድድር ተግባሩ ሚኒማውን የሚያሟሉ አራት አትሌቶችን ማስመዝገብ ይችላል፡፡
  3. ለዱላ ቅብብል እያንዳንዱ ቡድን ከአራት እስከ ስድስት አትሌቶች ማስመዝገብ ይችላል፡፡
  4. ክልሎች፣ ከተማ አስተዳደሮች፣ ክለቦችና ተቋማት የተሳታፊዎችን ስም ዝርዝርና ሌሎች መረጃዎች ከዚህ ደብዳቤ ጋር ተያይዞ በቀረበው ቅጽ መሠረት ሞልተው መላክ አለባቸው፡፡ የተወዳዳሪዎች ዝርዝር የትውልድ ዘመን ማካተት አለበት፡፡

አንቀጽ ስድስት

የውድድሩ ዓይነትና ሚኒማ

  1. ሚኒማው በ2008 ዓ.ም. በክልሎችና ከተማ አስተዳደሮች በተደረጉት ውድድሮች የተመዘገቡ ውጤቶች መሆን አለባቸው፤
  2. ማንኛውም ክልል/ክለብ፣ ተቋም አትሌቱ ሚኒማ ያስመዘገበበትን የሻምፒዮና ስም፣ ከተማና ቀን ውድድሩን ጨምሮ መገለጽ ይኖርበታል፡፡
  3. ለ46ኛው የኢትዮጵያ አትሌቲክስ ሻምፒዮና የውድድር ዓይነቶችና የመግቢያ ሚኒማ፡-
ለሴቶች የውድድሩ ተግባራት የወንዶች
100 ሜትር
200 ሜትር
400 ሜትር
2፡13.00 800 ሜትር 1፡50.00
4፡35.00 1500 ሜትር 3፡50.00
16፡40.00 5000 ሜትር 14፡20.30
36፡00.00 10,000 ሜትር 29፡30.00
--- 110 ሜ. መሠናክል 17፡00
100 ሜ. መሠናክል ---
400 ሜ. መሠናክል
--- 3000 ሜ. መሠናክል ---
--- 4 X 100 ሜትር ---
--- 4 X 400 ሜትር ---
--- አሎሎ ውርወራ ---
--- ዲስከስ ውርወራ ---
ጦር ውርወራ
--- መዶሻ ውርወራ ---
ከፍታ ዝላይ
--- ርዝመት ዝላይ ---
--- ሱሉስ ዝላይ ---
--- ምርኩዝ ዝላይ ---
--- 20 ኪ.ሜ. እርምጃ ---

አንቀጽ ሰባት

የተወዳዳሪ ቅያሪ

  1. ማንኛውም ቡድን በየውድድር ተግባሩ በየቀኑ የተወዳዳሪ ለውጥ ማድረግ ከፈለገ ቀጣይ ውድድር ከመደረጉ ከአንድ ቀን በፊት እስከ ቀኑ 6፡00 ሰዓት ለውድድሩ ከተመዘገቡት አትሌቶች ውስጥ ለቅያሪ በተዘጋጀው መቀየሪያ ቅጽ አትሌቶችን በማስመዝገብ የውድድሩ ቴክኒካል መረጃ ክፍል (TIC) ማቅረብ አለበት፡፡ የተወዳዳሪዎች ቅያሪ የሚደረገው በየውድድር ተግባራቱ ከተመዘገቡት አራት አትሌቶች ብቻ ይሆናል፡፡ ነገር ግን ከተጠቀሰው ሰዓት ውጭ ለሚቀርበው የተወዳዳሪዎች ቅያሪ ጥያቄ ተቀባይነት አይኖረውም፡፡
  2. በዱላ ቅብብል የተወዳዳሪዎች ጥንቅርና የአሯሯጥ ቅደም ተከተል ምዝገባ የሚካሄደው ለዱላ ቅብብል ውድድር የስም ጥሪ ከመደረጉ ከአንድ ሰዓት በፊት ለቴክኒካል መረጃ ክፍል ማሳወቅ ያስፈልጋል፡፡
  3. ለዱላ ቅብብል ከተመዘገቡት ከማንኛውም የውድድር ተግባራት ቀይሮ ማወዳደር ይቻላል፡፡ ይኸውም ለመጀመሪያ ዙር ውድድር ብቻ ይሆናል፡፡ ነገር ግን በቀጣይ ዙር ውድድሮች መቀየር የሚቻለው ለዱላ ቅብብሉ ከተመዘገቡት ሁለት አትሌቶች ብቻ ይሆናል፡፡

ንቀጽ ስምንት

በውድድሩ ላይ የሚሳተፉ አትሌቶችን ማሳወቅ /Final conformation/

          ተወዳዳሪ ቡድኖች በእያንዳንዱ የአትሌቲክስ ተግባራት የሚመወዳደሩትን አትሌቶች በቅደም ተከተላቸው መሠረት የመጨረሻ ምዝገባ በቴክኒካል ስብሰባ ቀን /ግንቦት 7/2009 ዓ.ም./  /Final conformation/ ያደርጋሉ፡፡

          ከመጨረሻ ምዝገባ በኋላ ሌሎች አትሌቶችን ቀይሮ ማወዳደር አይቻልም፡፡ ነገር ግን በሚቀርበው ሕክምና ማስረጃ መሠረት አትሌቶችን ቀይሮ ማወዳደር ይቻላል፡፡

አንቀጽ ዘጠኝ

የአትሌቱ ጤንነት

በውድድሩ ተካፋይ የሚሆን አትሌት ጤናው የተሟላ መሆን አለበት፤ ጤናው ያልተሟላ አትሌት በውድድሩ ተሳትፎ ቢገኝና ጉዳት ቢደርስበት ተጠያቂ የሚሆነው ክልሉ/ከተማ አስተዳድሩ፣ ክለቡ፣ የተቋሙ እና አትሌቱ ይሆናል፡፡

አንቀጽ አሥር

ውጤትን ስለመግለጽ

  1. የዕለቱ ውድድር ውጤቶች ለተወዳዳሪዎችና ለቡድኖች በየውድድሩ ጣልቃ በአስተዋዋቂ፣ በኮሙኒኬና በማስታወቂያ ሠሌዳ ይገልፃል፡፡
  2. በተገለጹት ውጤቶች ላይ ስህተቶች ካሉ ወዲያውኑ የቡድን መሪው/አሠልጣኝ የውድድሩ ቴክኒካል መረጃ ክፍል (TIC) በመቅረብ የማስተካከያ ጥያቄ ማቅረብ ይቻላል፡፡
  3. ከውድድሩ ቴክኒካል መረጃ ክፍል (TIC) የውድድሩ ውጤት ይፋ ሳይደረግ ውጤቱን ለህዝብ መግለጽ የተከለከለ ነው፡፡

አንቀጽ አሥራ አንድ

ክስና ይግባኝ ስለማቅረብ

  1. የአትሌት ተገቢነት የክስ ጥያቄ ማቅረብ የሚቻለው ቢያንስ ውድድሩ ከመጀመሩ ከ30 ደቂቃ በፊት ነው፡፡
  2. የውድድር ውጤቶችን ወይም የውድድር ተግባር ሁኔታን በተመለከተ የክስ ጥያቄ የሚቀርበው ውጤቱ ይፋ በሆነ በ30 ደቂቃ ጊዜ ውስጥ ነው፡፡
  3. ማንኛውም የክስ ጥያቄ መጀመሪያ የሚቀርበው ለውድድሩ ዳኛ (refree) በቃል በአትሌቱ፣ በአሠልጣኙ ወይም በቡድን መሪው አማካይነት ሊሆን ይችላል፡፡ የውድድር ዳኛው ውሳኔ መስጠት ወይም ጉዳዩን ለይግባኝ ሰሚ ኮሚቴ ሊያቀርብ ይችላል፡፡
  4. በዳኛው ውሳኔ ያልተስማማ አካል በጽሑፍ ከብር 300.00 (ሦስት መቶ ብር) ጋር ለይግባኝ ሰሚ ኮሚቴ ዳኛው ውሳኔ በሰጠ በ30 ደቂቃ ውስጥ ክስ ማቅረብ ይችላል፡፡
  5. ክሱ በክስ ሰሚ ኮሚቴ ተጣርቶ ተገቢ ክስ ሆኖ ከተገኘ የተያዘው ብር ተመላሽ ሆኖ ክሱ ተቀባይነት ይኖረዋል፡፡ ክሱ ተቀባይነት ካላገኘ የተያዘው ገንዘብ ለፌዴሬሽኑ ገቢ ይሆናል፡፡  ነገር ግን ክሱ ተቀባይነት ካላገኘ የተያዘው ብር ለፌዴሬሽኑ ገቢ ሆኖ ውሳኔው የፀና ይሆናል፡፡ ውሳኔውም የመጨረሻ ይሆናል፡፡

አንቀጽ አስራ ሁለት

አለባበስ

  1. ማንኛውም ተወዳዳሪ የክልሉን፣ የከተማ አስተዳደሩ፣ የክለቡና የማሠልጠኛ ማዕከሉን መለያ የሆነውን የስፖርት ትጥቅ መልበስ አለበት፤ መለያ ለብሶ ያልቀረበ ተወዳዳሪ መወዳደር አይችልም፤
  2. ማንኛውም የሜዳሊያ ተሸላሚ አትሌት የክልሉን፣ ከተማ መስተዳደሩን፣ የክለቡን ወይም የተቋሙን መለያ የሆነውን የስፖርት ልብስ ለብሶ ለሽልማት መቅረብ አለበት ይህ ካልሆነ ሽልማት አይሰጠውም፡፡

አንቀጽ አስራ ሦስት

የመወዳደሪያ መሮጫ ቁጥር

ማንኛውም ተወዳዳሪ አትሌት የመወዳደሪያ ቁጥር ሊኖረው ይገባል፣ ቁጥሩ የሚለጠፈው ግልጽ ሆኖ በሚታይ ቦታ በደረትና በጀርባ ላይ ነው፡፡ የምርኩዝ ዝላይና የከፍታ ዝላይ ተወዳዳሪዎች አንድ የመወዳደሪያ ቁጥር ብቻ በደረት ወይም ከጀርባ ላይ ለጥፎ መወዳደር ይቻላል፡፡ በሪሌ ውድድር ከጀርባ ቁጥር በተጨማሪ አትሌቱ የክልሉን፣ ከተማ አስተዳደሩን ወይም ክለቡን ስም የሚገልጽ ጽሑፍ በደረቱ ላይ መለጠፍ አለበት፡፡ የመወዳደደሪያ ቁጥር ከኢትዮጵያ አትሌቲክስ ፌዴሬሽን በቴክኒካል ስብሰባ ቀን ይሰጣል፡፡

አንቀጽ አስራ አራት

በስም ጥሪ ቦታ በሰዓት መገኘት

ማንኛውም ተወዳዳሪ ውድድሩ ከመጀመሩ በፊት ቢያንስ ከ45 ደቂቃ በፊት በስም ጥሪ ቦታ በመገኘት ለውድድሩ ዝግጁ መሆኑን ለስም ጠሪ ዳኞች ማሳወቅ ይኖርበታል፤ በስም ጥሪ ቦታ ተገኝቶ ስሙን ለስም ጠሪ ዳኞች ያላሳወቀ አትሌት በውድድሩ ላይ መካፈል አይችልም፤ ተወዳድሮ ቢገኝ ውጤቱ ይሰረዛል፡፡

አንቀጽ አስራ አምስት

የተወዳዳሪ ቴሴራ ወይም መታወቂያ

  1. አትሌቶች በስም ጥሪ ቦታ ማንነታቸውን የሚገልጽ በዘመኑ በክልሉ/ከተማ አስተዳደሩ አትሌቲክስ ፌዴሬሽን  የታደሰ ቴሴራ ወይም ፖስፖርት ይዘው መቅረብ አለባቸው፤ ስርዝ ድልዝ ያለው ቴሴራ ተቀባይነት አይኖረውም፡፡ ቴሴራ የሌለው በውድድሩ ላይ መሳተፍ አይችልም፤
  2. በቴሴራው/መታወቂያው ላይ የትውልድ ዘመን መገለጽ አለበት፤

አንቀጽ አስራ ሥድስት

ሽልማት

  1. በእያንዳንዱ የውድድር ተግባር ከ1ኛ-3ኛ ለሚወጡ አትሌቶች በሁለቱም ፆታ የወርቅ፣ የብርና የነሐስ ሜዳሊያ ሽልማት ይሰጣል፤
  2. በውድድሩ በቡድን ነጥብ የወንድ አሸናፊ እና የሴት አሸናፊ ለየብቻቸው የዋንጫ ሽልማት ይሰጣል፤
  3. የሴትና የወንድ ነጥብ ተደምሮ አብላጫ ነጥብ ላስመዘገበ አጠቃላይ ቡድን የዋንጫ ሽልማት ይሰጣል፤
  4. በውድድሩ ሦስት ወርቅ እና ከዚያ በላይ ሜዳሊያ ላመጡ አትሌቶች ልዩ ሽልማት ይሰጣል፡፡

አንቀጽ አስራ ሰባት

ያልተገባ ፀባይ

ማንኛውም ተወዳዳሪ አትሌት፣ አሰልጣኝ፣ የቡድን መሪ፣ ወጌሻ ወይም ሌሎች የቡድን አባላት ውድድሩ በሚከናወንበት ወቅት ያልተገባ ፀባይ ካሣየና ውድድሩን በሚመሩ ዳኞች ወይም የውድድር አዘጋጆች ሪፖርት ቀርቦ ጥፋቱ ከተረጋገጠ በአትሌቲክስ ፌዴሬሽን በተዘጋጀው የአሠልጣኞች፣ አትሌቶችና የክለቦች የሥነ-ምግባር ደንብ አንቀጽ አስር መሠረት ይቀጣል፡፡ 

አንቀጽ አስራ ስምንት

በውድድሩ መክፈቻና መዝጊያ ሥነ-ሥርዓት ላይ መገኘት

  1. በውድድሩ ተካፋይ የሚሆኑ ቡድኖች የቡድናቸውን አርማ ይዘው በተሟላ ስፖርታዊ አለባበስ እንዲሁም ባህላዊ አልባሳትን ለብሰው በውድድሩ መክፈቻና መዝጊያ ሥነ-ሥርዓት ላይ መገኘት አለባቸው፤
  2. እንደአስፈላጊነቱ ከውድድር በኋላ በሚደረጉ ቴክኒካል ስብሰባዎች የቡድን መሪዎች/አሠልጣኞች መገኘት አለባቸው፡፡

አንቀጽ አስራ ዘጠኝ

የዶፒንግ ምርመራ

          በ46ኛው የኢትዮጵያ አትሌቲክስ ሻምፒዮና የዓለም አቀፉ ፀረ ዶፒንግ ኤጀንሲ እና የኢትዮጵያ ፀረ ዶፒንግ ኦርጋናይዜሽን ሕግና ደንብ በሚፈቅደው መሠረት ከውድድሩ በፊት እና ከውድድሩ በኋላ የዶፒንግ ምርመራ ይከናወናል፡፡

አንቀጽ ሃያ

የቴክኒካል ስብሰባ

የቴክኒካል ስብሰባ ግንቦት 7/2009 ዓ.ም ከጠዋቱ 4፡ዐዐ በአዲስ አበባ ስታዲየም ይካሄዳል፡፡ በስብሰባው ከየቡድኑ አንድ ቡድን መሪና አንድ አሠልጣኝ ብቻ ይሳተፋሉ፡፡

አንቀጽ ሃያ አንድ

የክልሎችና የከተማ አስተዳደሮች ቡድን ኮታ

  1. የትግራይ ክልል 45 ሰው ቡድን መሪና አሰልጣኝን ጨምሮ፤
  2. አማራ ክልል 45 ሰው ቡድን መሪና አሰልጣኝን ጨምሮ፤
  3. ኦሮሚያ ክልል 45 ሰው ቡድን መሪና አሰልጣኝን ጨምሮ፤
  4. ደቡብ ክልል 45 ሰው ቡድን መሪና አሰልጣኝን ጨምሮ፤
  5. አዲስ አበባ አስተዳደር 45 ሰው ቡድን መሪና አሰልጣኝን ጨምሮ፤
  6. ሐረሪ ክልል 20 ሰው ቡድን መሪና አሰልጣኝን ጨምሮ፤
  7. ድሬዳዋ አስተዳደር 20 ሰው ቡድን መሪና አሰልጣኝን ጨምሮ፤
  8. ጋምቤላ ክልል 15 ሰው ቡድን መሪና አሰልጣኝን ጨምሮ፤
  9. አፋር ክልል 15 ሰው ቡድን መሪና አሰልጣኝን ጨምሮ፤
  10. ሱማሌ ክልል 15 ሰው ቡድን መሪና አሰልጣኝን ጨምሮ፤
  11. ቤኒሻንጉል ጉምዝ ክልል 25 ሰው ቡድን መሪና አሰልጣኝን ጨምሮ፤

ክልሎችና ከተማ አስተዳደሮች ከተሰጣቸው ኮታ ውጪ በራሳቸው ወጪ ተጨማሪ አትሌቶችን በውድድሩ ማሳተፍ የሚችሉ መሆኑን እንገልፃለን፡፡ 

የኢትዮጵያ አትሌቲክስ ፌዴሬሽን

for more information download the PDF  file 

Attachments:
Download this file (46th Ethiopian Athletics Champ Rule.pdf)46ኛው የኢትዮጵያ አትሌቲክስ ሻምፒዮና[ሕግና ደንብ]594 kB

Website by REMHAI ICT Solutions and Consulting